PP Cambodia- Yahlaik derai masa fir tuy jalan Preh Monivong mai tal Sang pah (hotel) Phnom Penh tabloh bet mai tuy gah aiw tangan, masafir labeh keghang 100m, derai hi bhoh Masjid haboh kong dhok chomkurh helok parong hasa mada paga abih tomdurgh.

Masjid ni chauk rang thao keghurn laik Masjid DUBAI. Habianlai derai naw di manauk bahbhang masjid dan derai lanyia naw gah aiw tangan nan derai akan hi bhoh sang gelong jiang rang pebih tauk kiak sebhua (maw) manghiah tehua atah mung bahbhang somgerik labeh kerang 40m. Sang gelong ni mada 3 jon luk sebhua (maw) buah manuk mada paga bit vil tomdurgh. Yahlaik derai mai tal manauk bahbhang sang ni , derai hi mit sap majarau tabiak mung sang. Ni jia sap bak Anurk siah kamai kamai cham dhok di dalam sang kong rang aiw laik Female Hostel ( Labik dhok anurk siah kamai ) di sang angka 16A jalan 93, Sangkat Srah Chok, Khan Daun Penh, Phnom Penh . Female Hostel ni ho chhauk rang bina ngak tang meng tehon 2006 mai yurh kong ho dhong mung Sathandut Sathearanakrot Alemang Phnom Penh dan ho bina bloh salah jarah di tehon 2008.

Dalam labik labia ni ho tadual Anurk siah samnuan 52 rang mai mung puk pelai chehong chehong di gawk yauka : Prek Sadai ( Khiat kracheh ), Jumnik, Rakakhno, Angkoban, Mak , Puksoy, Prek Kut, Kampong Treah, Peuh… ( Khiat Kampong Cham ) dan Khiat Posat, Battambang, Kandal, Kampong Chhanang, kampong Thom dan kaghai kaghai nao gaik. Di dalam antara khiat tongbih ni mada anurk siah kamai mai murng khiat Kampong cham lo jiang rang.

Hadom hadom anurk siah kamai kamai ho patom gauk mai mung puk pelai tah dhoh di madan Phnom Penh pindah tabiak tah mung amik amur, miwk wa, dai saai nan yurh ontoq mai magu ilmu tuy Kolliyah (faculty) dalam madan yauka manurng gauk kabong dhok baik tehon yangka hasa ka dua ka kelau dan ka 4 dhok di Sakal Vitchialai Jiat Grop Grong, Sakal Vitchialai Phnom Penh Antrajiat, Vitchiasah Sokhaphibal, Phumin Nittesah nurng Vitchiasah Setkic dan kong kong lo nyo nan yurh dhok dalam Sakal Vitchialai Norton.

Anurk siah tongbih ni baik chehong chehong di gauk yauka baik ping gah Business, Architect, Pharmacy, English, Information Technology (IT) dan kaghai naw gaik. Anurk siah kamai harang ngin Fa Eysas Binti Abdullah baik tehon di pak ping gah IT dhok Sakal Vitchialai Norton dan jia orang aiwk chehong chhauk dalam Female hostel ho mayai berai tehaw laik: Female Hostel kong mada Anurk siah tongbih samnuan 52 rang mada hatai oan tabuan biak bai kong Samagum Allemeng ho dhong bina ngak sang ni ontoq berai pehong Anurk sih kamai hadiwk dhok hong siam makur.

Tatapi valaupon yau habue kadeh Anurk siah tong bih dhok te mada masalah siksa dalam masalah siahuy seda chomnai ping gah bhurng huak, jian baya la puy dan ia kung anurk siah tongbih chhauk rai jian padal rub. Tatapi nuik siah pehiak lo mada tuah dalam barok mago ilmu kayua laik ho tadual berok dhong (Scholarship) mung Samagum Aphivat Khmer Islam (CMCD) kong mada Ekudom Ahmad Yahya jia amir duy ba dan jia Anukrat lekhathika Krasuang Sangumkic hong Atitak Yutjun Yukviak Nitek Sapatia ho dhong Paya jian sala. Dan mada Anurk siah manurng tagaik ho tadual dhong mung ALMANAR dan mung IDB (Islamic Development Bank). Tatapi di antra Anurk siah tongbih nan ka mada pehiak lo di ho mada tadual dhong mung helai oh dan jia anurk matuy gaik. Oleh sabab yaunan pehiak lo pehong git kabong dhok toam hong masalah khuah karang.

Fa Eysas Binti Abdullah lakau samnombo nau pak miwk wa tian parurn tong bih dalam hong langiv nagar berai dhong tal anurk siah kamai cham tongbih ni hai ontoq berai bangsa cham derai ho magu ilmu donya dan akhirat berai ho lo ontoq mai pabhah ngak Musharakat islam dan qa yauka bangsa cham darai barai ho samparna. Dan rop git harap laik anurk siah dalam Female Hostel tongbih akan hi ho tadual berok patal dhong mung miwk wa bangsa cham tong bih ti waktu gah nauk.

Lakao pahadurgh rai laik Samagum Aphivat Khmer Islam (CMCD) ho patahim programe pata baik ugama dan bahsa English ghil ghil harai dan ghil harai dit tal anurk siah dalam Female Hostel. Dan anurk siah kamai cham pehiak lo tagaik kong pah sang dhok dalam madan Phnom Penh ontoq mai magu ilamu.

oleh Islamiyah Mohammad

6-1-09